कालिकोट ~रास्कोट नगरपालिकामा  मेरो माइक्रो फाइनान्स लघुवित्त वित्तीय संस्था लिमिटेड शाखा कार्यालय रास्कोट, कालिकोटद्वारा आयोजित वित्तीय साक्षरता अभिवृद्धि तथा ग्राहक गुनासो सुनुवाइ कार्यक्रम शाखा प्रबन्धक श्री करन बहादुर चन्दको सभापतित्वमा भव्य तथा सफलतापूर्वक सम्पन्न भएको छ।
कार्यक्रममा रास्कोट नगरपालिका वडा नं. ५ का वडा अध्यक्ष श्री मन तिरुवा प्रमुख अतिथिको रूपमा उपस्थित रहनुका साथै प्रदेश नं. ६ र ७ का प्रदेश प्रमुख श्री सरोज पण्डितको विशेष उपस्थिति रहेको थियो। त्यसैगरी, इलाका प्रहरी कार्यालय रास्कोटका प्रमुख श्री प्रेमजंग शाही तथा संस्थाका अनुगमन अधिकृत श्री दीपक भट्टले अतिथिको रूपमा सहभागिता जनाउनुभएको थियो।
उक्त कार्यक्रममा विभिन्न केन्द्रहरूबाट केन्द्र प्रमुख तथा सदस्यहरूको उल्लेखनीय र उत्साहजनक सहभागिता रहेको थियो, जसले कार्यक्रमलाई अझ प्रभावकारी र जीवन्त बनाएको थियो।
कार्यक्रमको प्रमुख आकर्षणको रूपमा प्रदेश प्रमुख श्री सरोज पण्डितद्वारा स्लाइड शो मार्फत वित्तीय साक्षरताका विविध पक्षहरू—बचतको महत्व, ऋणको सदुपयोग, वित्तीय अनुशासन तथा आत्मनिर्भरता—बारे विस्तृत प्रशिक्षण प्रदान गर्नुभयो। यसले सहभागीहरूलाई व्यवहारिक ज्ञान हासिल गर्न सहयोग पुगेको देखिएको छ।
प्रमुख अतिथि श्री मन तिरुवाले आफ्नो मन्तव्यमा बचत गर्ने बानीको विकास गर्दै साना कर्जाबाट साना व्यवसाय सुरु गरी आत्मनिर्भर बन्ने प्रेरणा दिनुभयो। उहाँले स्थानीय स्तरमा उद्यमशीलता विकास नै आर्थिक समृद्धिको आधार भएको उल्लेख गर्नुभयो।
कार्यक्रमका सभापति तथा शाखा प्रमुख श्री करन बहादुर चन्दले शाखाको हालसम्मको प्रगति विवरण प्रस्तुत गर्दै संस्थाले प्रदान गर्दै आएका विभिन्न सेवा सुविधा—सहज कर्जा प्रवाह, बचत कार्यक्रम, सामाजिक सुरक्षा योजनाहरू तथा सदस्यमैत्री सेवाहरू—बारे विस्तृत जानकारी गराउनुभयो।
फरक भूगोल, फरक संस्कृति र विविधताबीचको एकताको सन्देश बोकेको यस कार्यक्रमले सहभागीहरूमा नयाँ ऊर्जा, उत्साह र सकारात्मक सोचको विकास गरेको प्रतिक्रिया केन्द्र प्रमुख तथा सदस्यहरूबाट प्राप्त भएको छ।
कार्यक्रम होटल न्यौपाने, आरसीपी बजार, रास्कोट, कालिकोटमा भव्य र अनुशासित वातावरणमा सम्पन्न भएको थियो। यस्ता कार्यक्रमहरूले वित्तीय सचेतना अभिवृद्धि गर्नुका साथै समुदाय स्तरमा दिगो आर्थिक विकासमा महत्वपूर्ण योगदान पुर्‍याउने विश्वास गरिएको छ।समचारको लागि टिकाराज उपाध्याय(आफन्त) कालिकोट