कालीकोट — सान्नित्रिबेणी गाउँपालिका–४ घर भई हाल वडा नं. ९ मा बस्दै आएका ४८ वर्षीय सूर्यबहादुर शाही मृत अवस्थामा फेला परेको घटनामा प्रहरीले उनकै छोरा र श्रीमतीलाई पक्राउ गरेको छ।
प्रहरीका अनुसार शाही मिति २०८३ जेठ २७ गते साँझ करिब ८:३० बजे सान्नित्रिबेणी गाउँपालिका–९ स्थित सुपेचौरको गोरेटो बाटोमा मृत अवस्थामा फेला परेका थिए।
घटनाको अनुसन्धानका क्रममा मृतकका १८ वर्षीय छोरा रूपेश शाही र ४१ वर्षीया श्रीमती राजकला शाहीले टाउकोमा ढुंगाले प्रहार गरी हत्या गरेको खुलेको प्रहरीले जनाएको छ।
घटनामा संलग्न रहेको आरोपमा दुवै जनालाई पक्राउ गरी सम्मानित कालीकोट जिल्ला अदालतबाट ७ दिनको म्याद थप अनुमति लिई थप अनुसन्धान भइरहेको प्रहरीले जनाएको छ।
प्रहरीले घटनाको कारण र अन्य विवरणबारे अनुसन्धान जारी रहेको बताएको छ।
